Hólmbert Friðjónsson hefur átt góðan feril erlendis en hann leikur í dag með Aalesund í Noregi.

Hólmbert er 26 ára gamall en hann hefur raðað inn mörkum með liðinu síðan hann samdi árið 2018.

Hann var áður á mála hjá KR og Stjörnunni hér heima og spilaði einnig með Celtic sem táningur.

Hólmbert ræddi í dag við heimasíðu Aalesund þar sem farið var yfir feril leikmannsins til þessa.

Þar greinir Hólmbert frá því að afi hans hafi haft stærstu áhrif á ferilinn. Hann var sjálfur leikmaður en þurfti að hætta 27 ára gamall vegna meiðsla.

,,Hann var alltaf með mér úti í garði og bætti mína tækni alveg frá því að ég var ungur strákur,“ sagði Hólmbert.

,,Frá 5 til 18 ára aldurs þá tók hann þátt í öllum æfingunum mínum með liðinu. Hann sat í bílnum og horfði á hverja einustu æfingu.“

,,Hann sýndi þessu mikinn áhuga og gaf mér ís í hvert skipti sem ég stóð mig vel á æfingu. Ef ég gerði ekki vel þá fórum við yfir það saman.“

,,Hann lifði fyrir þetta, að halda mér á tánum og að gerast atvinnumaður. Það er allt honum að þakka.“

Afi hans reynir enn að fylgjast með öllu því sem gengur á en hann er 79 ára gamall.

Tvisvar hefur hann ferðast til Noregs til að horfa á Hólmbert spila og reynir alltaf að sjá þá leiki sem eru í boði á netinu.

,,Hann finnur streymiþjóna á netinu. Ef hann getur það ekki þá skoðar hann Twitter síðu félagsins.“

,,Af og til þá hringir hann í mig og spyr hvernig þetta hafði gengið. Hann heimsótti mig á síðasta ári og sá mig gegn Notodden. Árið áður sá hann mig spila við Asane.“