Manchester United og Sporting Lisbon eru nú að deila um kaupverðið á Bruno Fernandes, miðjumanni félagsins. United vill kaupa Fernandes og Sporting er tilbúið að selja. Talið er að Fernandes sé á leið til United í þessum glugga vegna fjárhagsvandræða Sporting Lisbon. Ensk blöð segja að United sé búið að bjóða 50 milljónir punda, og 10 milljónir punda að auki í bónusa. Það fer eftir frammistöðu liðsins og Fernandes, hversu mikið Sporting fær af því.
Sporting vill hins vegar 64 milljónir punda strax, ekki neina bónusa en félögin deila um þessi mál núna. Fernandes hefur sjálfur samið um kaup og kjör við United, ESPN og Telegraph segja frá. Búist er við að boltinn fari að rúlla hraðar og gæti Fernandes orðið leikmaður United á næstu dögum.
Ensk blöð segja að líklegt sé að Fernandes spili sinn síðasta leik fyrir Sporting gegn Benfica á föstudag, um er að ræða slag risana í Portúgal og allt er undir.
Sporting er tilbúið að hleypa Fernandes eftir það og telur enska blaðið Mirror að Fernandes verði í stúkunni þegar United heimsækir Anfield á sunnudag.
