Tilkynning Leiknis R:

Máni Austmann Hilmarsson er orðinn leikmaður Leiknis en hann skrifaði undir tveggja ára samning við félagið í höfuðstöðvum Domusnova í dag.

Máni er tvíburabróðir Dags sem gekk í raðir Leiknis fyrr í vetur.

Þeir bræður eru 21 árs og uppaldir Stjörnumenn. Dagur er varnarmaður en Máni er hinsvegar sóknarleikmaður.

Máni er við nám í Bandaríkjunum, hann kemur til Leiknis í byrjun maí og heldur svo aftur út í ágúst.

Máni lék 8 leiki með HK í Pepsi Max-deildinni í fyrra en hann hjálpaði liðinu að komast upp í deild þeirra bestu árið á undan.

„Máni bætist í hóp góðra leikmanna sem hafa gengið í okkar raðir fyrir komandi tímabil. Leikmannahópurinn er orðinn mjög öflugur, samkeppnin innan hans er mikil og spennandi verður að fylgjast með undirbúningi liðsins áður en skemmtilegasta deild landsins verður flautuð á næsta sumar,” segir Oscar Clausen, formaður Leiknis.