Paul Merson, fyrrum leikmaður Arsenal og Englands hefur síðustu mánuði og ár ákveðið að reyna að berjast við vandamál sín af fullum krafti. Merson var langt niðri eftir mörg ár af drykkju og veðmálum.
Hann segir að bataferli sitt hafi hafist þegar hann áttaði sig á veikindum sínum, hann íhugaði að taka eigið líf fyrir rúmu ári.
,,Þetta er bara sjúkdómur, ég taldi mig alltaf vera slæma persónu. Ég var að drekka mikið og mikið að stunda veðmál, ég vildi það ekki en ég hélt alltaf áfram. Ég endaði alltaf á sama stað, ég fór að hugsa að þetta væri ekki eðlilegt. Ég væri nú ekki það slæm persóna,“ sagði Merson þegar hann opnaði sig á Sky Sports í gær.
,,Þegar ég áttaði mig á því að þetta væri sjúkdómur, að ég væri með sjúkdóm. Í dag, tala ég við fólk þegar mér líður illa. Ég hætti ekki að svara í símann, ég svara og ræði mín mál.“
,,Fólk þarf að átta sig á því að það er ekki slæmt, þrátt fyrir að glíma við vandamál. Það mikilvægasta er að ræða málin, þú verður að gera það til að ná bata.“
