Vængmaðurinn Nani var hársbreidd frá því að ganga í raðir Juventus árið 2013, sama ár og Sir Alex Ferguson yfirgaf Manchester United.

Nani staðfesti þetta sjálfur í viðtali við Tribuna Expresso en hann leikur í dag með Orlando City í Bandaríkjunum.

Nani var óánægður hjá félaginu á þessum tíma og vildi komast burt – sérstaklega eftir að hafa verið á bekknum í úrslitum Meistaradeildarinnar árið 2011.

,,Þegar Ferguson fór þá vildi ég gera það sama. Ég taldi það vera rétta tímann. Það sem hafði gerst skildi mig eftir óánægðan,“ sagði Nani.

,,Ákvörðunin kom mér verulega á óvart og ég taldi það best að fá tækifæri hjá öðru liði í kannski annarri deild.“

,,Ég var búinn að hugsa þetta út í gegn. Það var bara ekki svo auðvelt, Manchester ætlaði ekki að hleypa mér burt auðveldlega.“

,,Eftir að hafa jafnað mig af meiðslum þá var ég á leið til Juventus, allt var að ganga upp. Juventus vildi mig, stjórnarformaðurinn sagði já og stjórinn sagði já.“

,,Svo á síðustu stundu þegar glugginn var að loka þá sögðu þeir að ég mætti ekki lengur fara.“

,,Ég varð mjög sár og við rifumst. Eftir að hafa hugsað þetta þá sagði ég við þá að ég væri hér og að ég myndi gera mitt besta.“