Það væri mjög erfitt fyrir miðjumanninn Philippe Coutinho að semja við lið Manchester United.
Þetta segir umboðsmaður leikmannsins Kia Joorabchian en Coutinho er orðaður við brottför frá Barcelona þessa stundina.
Coutinho var áður frábær fyrir Liverpool en gerði samning við spænska stórliðið í byrjun síðasta árs.
,,Manchester United er frábært félag og þar eru leikmenn sem ég ber virðingu fyrir. Varðandi Philippe þá væri það hins vegar erfitt og nánast ómögulegt skref,“ sagði Joorabchian.
,,Það væri erfitt fyrir Philippe að spila fyrir keppinauta Liverpool því honum þykir svo vænt um félagið. Hann eyddi frábærum árum þar. Hjarta hans er hjá Liverpool.“
