Sara Katrin Fischer Vignisdóttir, er ung stúlka sem lenti í alvarlegu hjólreiðaslysi í lok maí. Hún hefur síðan þá verið að ná bata.

Friðgeir Bergsteinsson, rótari Íslands þekkir til Söru og ákvað að gleðja hana í bataferlinu. Sara leikur með Víkingi í fótbolta.

Friðgeir fékk tvær landsliðsstelpur til að gleðja Söru.

,,Ég hafði samband við foreldra hennar og spurði hvort ég mætti gera eitthvað fallegt fyrir Söru. Í kjölfarið talaði ég við tvær landsliðsstelpur, Hallberu Gísladóttur og Fanndísi Friðriksdóttur, og spurði þær hvort þær væru tilbúnar að kíkja í heimsókn til Söru með gjöf frá mér til hennar og lífga upp á daginn hennar aðeins. Þetta sló heldur betur í gegn og Sara brosti sínu blíðasta og klæddi sig í landsliðstreyjuna (sem ég fékk frá Errea) númer 44 sem er einmitt númerið sem hún leikur í hjá sínu uppeldisfélagi, Víkingi,“ skrifar Friðgeir.

Friðgeir er þakklátur að Fanndís og Hallbera hafi viljað gera þetta góðverk.

,,Ég er svo þakklátur þeim Fanndísi og Hallberu fyrir það hversu miklar fyrirmyndir þær eru, innan sem utan vallar, fyrir þessar ungu stelpur sem fylgjast með þeim. Þær eru svo magnaðar, hlýjar og góðar fyrirmyndir, TAKK stelpur fyrir ykkar framlag. Söru Katrínu og fjölskyldu sendi ég góðar og hlýjar kveðjur og veit fyrir víst að Sara verður sigurvegarinn í þessari baráttu sem framundan er og mun koma sterkari til baka. Hlakka til að fylgjast vel með henni og hver veit nema hún endi einn daginn í landsliðinu eins og Fanndís og Hallbera eru núna.“