Ítalska stórliðið Fiorentina er búið að bjóða í varnarmanninn öfluga Sverri Inga Ingason. Þetta segja grískir fjölmiðlar í dag en Sverrir spilar með PAOK í Grikklandi og hefur staðið sig vel.

Nýlega var greint frá áhuga Fiorentina en Top10.gr segir nú að það sé tilboð á borðinu í Sverri. Ítalska liðið er tilbúið að borga 4,5 milljónir evra fyrir Sverri en PAOK ku vilja fá hærri upphæð.

Sverrir ólst upp hjá Breiðablik en ef af verður yrði kaupverðið 612 milljónir íslenskra króna. Ansi líklegt er að gríska félagið vilji þó hærri upphæð.

Ef Sverrir yrði keyptur á 612 milljónir myndi Breiðablik fá rúma 21 milljón í sinn vasa, vegna uppeldisbóta sem félagið á rétt á.

Breiðablik hefur fengið væna summu vegna félagaskipta Sverris en hann hefur farið frá Noregi til Belgíu, þaðan fór hann til Spánar. Sverrir var svo seldur frá Granada á Spáni til Rostov í Rússlandi, PAOK keypti svo Sverrir frá Rússlandi fyrir tæpu ári.

Breiðablik á rétt á 3,5 prósenti af kaupverðinu á Sverri.