Sean Sogliano, yfirmaður knattspyrnumála hjá Calcio Paova hefur staðfest áhuga félagsins á að semja við Emil Hallfreðsson. Emil hefur æft með félaginu undanfarið.

Emil hefur verið án félags síðan í sumar þegar samningur hans við Udinese rann út, Padova leikur í þriðju efstu deild Ítalíu en Emil skoðar hvort aðrir kostir komu upp. Ef ekkert annað kemur eru líkur á að Emil semji við liðið til að eiga möguleika á sæti í íslenska landsliðinu, fyrir umspilið um sæti á EM og síðan sæti í EM hópnum ef allt fer vel.

,,Emil? Hann vill spila á meðal þeirra bestu, til að geta átt möguleika á Evrópumótinu með Ísland. Hann var hjá mér í þrjú ár hjá Verona, honum hefur liðið vel á Ítalíu,“ sagði Sogliano.

,,Hann er frábær leikmaður, hann er ekki ungur en hann er frábær persóna. Algjör atvinnumaður, þegar leikmenn í þessari deild sjá hvernig hann hugsar um sig, þá læra þeir. Það er möguleiki á að samstarf milli Padova og Emils gangi upp.“

,,Ég bað hann um að koma of æfa hérna, sjá nokkra leiki og skoða síðan málið. Við munum ræða málið í rólegheitum og taka stöðuna.“