Sam Allardyce, fyrrum stjóri enska landsliðsins, segir að hann gæti reddað vörn Arsenal og það strax.
Vörn Arsenal hefur verið í molum síðustu vikur og var það lengi undir stjórn Unai Emery sem var rekinn.
Allardyce telur að hann sé með hæfileikana í að laga vandamál Arsenal en hann er þó ekki nefndur til sögunnar sem næsti stjóri liðsins.
,,Arsenal er búið að týna sér eins og er. Þeir þurfa að tengja saman á ný, einhver þarf að taka yfir klefann,“ sagði Allardyce.
,,Ég gæti farið þarna og gert vörn Arsenal betri strax á morgun, það yrði ekkert vandamál.“
,,Ég hef gert það alls staðar sem ég hef unnið – Newcastle, Blackburn, Bolton, West Ham, Crystal Palace og Everton.“
,,Ég mun þó aldrei koma til greina, ég er ekki nógu tískulegur fyrir Arsenal.“
