Aron Einar Gunnarsson, fyrirliði Íslands í knattspyrnu og eiginkona hans, Kristbjörg Jónasdóttir samfélagsmiðlastjarna og einkaþjálfari eru að opna nýtt fyrirtæki.
Frá þessu greina þau á Instagram síðum sínum í kvöld en ekkert er gefið upp um hvers konar rekstur er að ræða.
,,Ég er að koma til Íslands, ég er búinn að vera að vinna að verkefni. Að stofna fyrirtæki, ég get loksins farið að deila því með ykkur. Eftir nokkra daga,“ segir Kristbjörg á Instagram síðu sinni.
Þau hjónin hafa verið talsvert í viðskiptalífinu hér á Íslandi og eiga meðal annars hlut í Bjórböðunum sem notið hafa vinsælda á Árskógssandi.
Aron Einar er einn þekktasti núlifandi Íslendingurinn, hann hefur öðlast heimsfrægð eftir gott gengi íslenska landsliðsins í knattspyrnu. Hann leikur í dag með Al-Arabi í Katar þar sem fjölskyldan býr.
Fram kemur að fyrirtækið verði formlega opinberað þann 13 desember en á meðan hvílir mikil leynd yfir málinu.
