Uppsagnir hafa staðið yfir á Morgunblaðinu í dag en sagt hefur verið frá að 15 starfsmönnum fjölmiðilsins, hafi verið sagt upp í dag.

Þrír af íþróttadeild Morgunblaðsins, fengu uppsagnarbréfið sitt í dag en þar á meðal var Guðmundur Hilmarsson. Um er að ræða einn virtasta og reynslumesta íþróttablaðamann landsins. Guðmundur átti farsælan feril sem knattspyrnumaður í FH á árum áður.

Samkvæmt upplýsingum sem DV hefur fengið voru þeir Sindri Sverrisson og Ívar Benediktsson einnig reknir úr starfi af íþróttadeild Morgunblaðsins, báðir hafa mikla reynslu í starfinu.

,,Fagnaði á dögunum 30 ára starfsafmæli í íþróttafréttamennskunni en þau verða ekki fleiri í bili,“ skrifar Guðmundur á Facebook í dag.

Guðmundur hefur starfað sem blaðamaður í 30 ár, hann hefur haft mikla virðingu í starfi. Þannig hefur Guðmundur verið á meðal þeirra sem hafa leitt umfjöllun um íslenska landsliðið. ,,Eftir tæplega 20 ára starf á Mogganum fékk ég reisspassann ásamt fleira fólki í dag og þar af tveir félagar mínir á íþróttadeildinni. Þessi tími er búinn að vera frábær og að vinna við að fjalla um íþróttir, sem eru mér svo kærar, hefur gefið mér mikið. Er stoltur af störfum mínum og geng frá borði beinn í baki. Vonandi tekur eitthvað skemmtilegt við.“