Hjörvar Hafliðason, maðurinn sem vinnur alltaf heimavinnuna í Dr. Football skellti gulu spjaldi á landsbyggðina í þætti sínum í dag. Ástæðan eru meintar lygar, frá formanni KFR í 4. deild hér á landi.

Eric Djemba-Djemba, fyrrum miðjumaður Manchester United er samkvæmt Hjörvari að ræða við KFR um að ganga í raðir félagsins. Þessu harðneitaði stjórnarmaður félagsins, við Fótbolta.net í síðustu viku

,,Núna er alltaf talað þannig, „Hjörvar þú ert eini vinur landsbyggðarinnar“, ég verð að henda gulu spjaldi á þá. Það er staðfest að KFR hefur verið að ræða við Djemba-Djemba,“ sagði Hjörvar.

Útsendari Hjörvars, sendi sína menn á stúfana og einn þeirra náði að tala við Djemba-Djemba á Instagram.

,,Dr. Football herinn, er skemmtilegur. Hefur verið að senda á Djemba-Djemba á Instagram, um að bossin hjá KFR segi að þetta sé ekki rétt. Djemba-Djemba svarar og segir að þetta sé allt rétt, hann sé að ræða við íslenska liðið KFR. „Af hverju er verið að ljúga upp á mig?“ Gult spjald á þennan formann, fékk vinsælustu fréttina á .net fyrir lygi.“

Djemba-Djemba er 38 ára gamall og er frá Kamerún, hann hefur flakkað víða um á síðustu árum en gæti nú endað á Suðurlandinu.