Arnar Gunnlaugsson, þjálfari Víkings R, var gestur í hlaðvarpsþættinum vinsæla Dr. Football á fimmtudag.
Arnar náði flottum árangri með Víkingum á sínu fyrsta tímabili í sumar en liðið spilaði oft glimrandi góðan bolta.
Það var þó ekki fyrsta starf Arnars í knattspyrnu en hann þjálfaði ÍA með bróður sínum Bjarka 2006, 2008 og 2009.
Þeir voru þar spilandi þjálfarar og var gengið alls ekki gott undir lokin og voru þeir látnir taka poka sinn.
Arnar ræddi þann tíma við Hjörvar Hafliðason, umsjónarmann þáttarins, og viðurkennir erfiðleikana.
,,Það var bara Titanic eftir að hún var búin að lenda á ísjakanum,“ sagði Arnar um þann tíma.
,,Án þess að það hljómi eins og afsökun þá er mjög erfitt að vera leikmaður og þjálfari. Ég myndi segja að það sé nánast ekki hægt. Sérstaklega þegar þú varst svona leikmaður eins og við.“
Arnar segir að þeir bræður hafi ekki látið mikið í sér heyra sem leikmenn og kom það niður á þjálfarahæfileikunum á þessum tíma.
,,Þú spilaðir nú með okkur með KR og þú manst hvernig við vorum í búningsklefanum, við vorum ekki hoppandi brjálæðingar heldur vorum mikið inni í okkur og pæla í okkar leik, bæði fyrir leik og í hálfleik þar sem þjálfarinn vinnur fyrir kaupinu sínu.“
,,Einhverra hluta vegna þá seinni hluta árs 2008 og 2009 þá náðum við ekki að synca þessu saman. Án þess að fara í enn frekari afsakanir þá var þetta svolítið hrun-ár og hausinn var fastur í kannski bulli.“
Það er allt annað upp á teningnum hjá Víkingum og getur Arnar einbeitt sér algjörlega að því starfi.
,,Nú er ég bara í fulltime jobbi hjá Víkingum og það er bara fulltime job. Ég geri ekkert annað en að horfa á fótbolta. Ég er að klippa leiki og geri nánast allt. Þetta krefst mikillar athygli, hausinn var annars staðar. Við vorum bara lélegir ef ég á að segja eins og er.“
