Í gærkvöldi skrifaði hinn enski Chris Brazell undir samning sem yfirþjálfari yngri flokka hjá Gróttu. Chris mun einnig verða annar af tveimur þjálfurum 5. flokks karla og hafa umsjón með þróun og afreksþjálfun.

Chris, sem er 27 ára gamall, er með UEFA-A þjálfaragráðu og BA gráðu í alþjóðasamskiptum frá University of Lincoln. Chris starfaði í fjögur ár í akademíu enska stórliðsins Norwich þar sem hann var m.a. aðalþjálfari U14 ára liðs félagsins og vann með leikmönnum sem voru að stíga sín fyrstu skref í aðalliðinu.

Við undirskriftina í gær sagði Chris meðal annars:

„Ég er mjög ánægður með að vera kominn til Gróttu og þakklátur fyrir hve vel hefur verið tekið á móti mér. Ég fékk tækifæri til að kynnast félaginu þegar ég kom í heimsókn sumarið 2018 og veit hve kraftmiklir og góðir þjálfarar vinna hjá Gróttu. Það vakti því strax áhuga minn þegar haft var samband við mig og ég er mjög spenntur fyrir komandi tímabili. Grótta þjónar mikilvægu hlutverki í samfélaginu og mér finnst það vera eitt mikilvægasta verkefnið – að Grótta haldi áfram að vera mikilvægur partur af hverfinu og halda einkennum félagsins á nýjum og spennandi tímum.“