Það voru margar sögusagnir á kreiki í sumar þegar Pepsi-Max deild karla fór fram.

Stórlið FH var mikið í umræðunni en talað var um veruleg fjárhagsvandræði félagsins sem var ekki í Evrópukeppni.

Við fengum Davíð Þór Viðarsson, fyrrum fyrirliða FH, til að ræða þessi mál í hlaðvarpsþættinum 90 Mínútur.

Talað var um að margir leikmenn væru ekki að fá greidd laun og hafi farið í verkfall vegna þess.

Davíð viðurkennir að þessi mál hafi haft áhrif en að margar sögusagnir hafi verið mjög ýktar.

,,Já það hefur áhrif þegar hlutirnir eru ekki í lagi. Auðvitað voru þessar sögur stórlega ýktar og allt svoleiðis en það er ekkert launungarmál að það er ekki auðvelt að reka knattspyrnudeild á Íslandi. Það er fullt af mönnum á góðum launum,“ sagði Davíð.

,,Hins vegar það afsakar það ekki að svona hlutir eiga að vera í lagi og það hefur áhrif ef þeir eru það ekki. Þetta er bara hlutur sem hefur engin úrslitaáhrif á eitt eða neitt og það er ekki ástæðan fyrir því að við unnum ekki deildina og eitthvað svoleiðis.“

Davíð segir að félagið þurfi að taka á þessum málum og hjálpar það verulega að vera komnir aftur í Evrópu.

Davíð bendir á að það sé skilyrði fyrir lið á borð við FH að spila í Evrópukeppni á hverju einasta tímabili.

,,Þetta hjálpar ekki og við þurfum bara, klúbburinn og félagið að sjá til þess, ég tek það reyndar fram að þetta var stórlega ýkt, það gerist þegar sögur fara á kreik en við þurfum bara að sjá til þess að komast í betri mál hvað þetta varðar.“

,,Það er ekkert skrítið heldur, við misstum af Evrópukeppni í fyrsta sinn í rosalega mörg ár. Að sjálfsögðu gerir það þetta meira krefjandi og við einhvern veginn ákváðum að halda bara áfram, við ætlum að ná Evrópusæti á næsta ári. Við ætluðum líka að vinna deildina og bikarinn.“

,,Það er lágmarkskrafa að komast aftur í Evrópukeppni og það tókst og nú þarf klúbburinn og þeir sem starfa fyrir félagið að sjá til þess að þessir hlutir verða í lagi. Af lang stærstum hluta á mínum ferli þá voru þessir hlutir í mjög góðu lagi.“