Það er mikil vinna fram undan á skrifstofunni í Kaplakrika ef setja á saman lið sem berst um titla á næsta ári. Hópur liðsins nú þegar æfingar eru að fara af stað á nýjan leik, er þunnskipaður.
Ólafur Kristjánsson er á leið inn í sitt þriðja tímabil með FH, hann þarf að smíða nýjan leikmannahóp í þriðja sinn. Sögur um fjárhagsörðugleika og ósætti í leikmannahópnum hafa verið bornar á torg í hlaðvarpsþáttum, ekkert hefur fengið staðfest.
Ef hópur FH frá því í sumar er skoðaður eru aðeins tíu leikmenn eftir sem spiluðu eitthvað hlutverk á síðustu leiktíð. Cedric D´Ulivo , Halldór Orri Björnsson , Kristinn Steindórsson , Vignir Jóhannesson hafa alir yfirgefið félagið.
Davíð Þór Viðarsson hefur lagt skóna á hilluna og Pétur Viðarsson er sagður íhuga það sama. Atli Guðnason er samningslaus og hefur ekki gert upp hug sinn.
Gunnar Nielsen er samningslaus og gæti farið, Morten Beck Anderson er samningslaus. FH vill framlengja við hann, framherjinn raðaði inn mörkum í Krikanum, en óvíst er hvað gerist.
Þá er Þórir Jóhann Helgason, hinn ungi og efnilegi leikmaður án samning. Því eru aðeins tíu leikmenn eftir hjá FH sem spiluðu eitthvað hlutverk á síðustu leiktíð.
Svona gæti lið FH litið út en það vantar ellefta manninn til að geta sett saman ágætis byrjunarlið. Ljóst má vera að Ólafur og stjórn FH vinnur hörðum höndum að því að stækka hóp sinn. Yngri flokkar FH hafa ekki verið að skila inn góðum leikmönnum síðustu ár, sem gerir verkið enn erfiðara.
