Í vikunni var haldinn opinn vinnufundur í höfuðstöðvum KSÍ með yfirskriftinni „Blásið til sóknar – stelpur í fótbolta“ þar sem lagðar voru fram spurningar til umræðu varðandi mótafyrirkomulag í yngri flokkum kvenna og meistaraflokki kvenna. Þátttakendur á vinnufundinum voru um 60 manns frá félögum víðs vegar af landinu – þar af 40 þátttakendur á staðnum og 20 í gegnum fjarþátttöku

Bakgrunnur fundarins er sá að í framhaldi af samþykkt ársþings KSÍ í febrúar á þessu ári um heildræna endurskoðun á knattspyrnu kvenna var ákveðið að stofna til fjögurra vinnuhópa með það að markmiði að endurskoða ýmsa þætti knattspyrnu kvenna. Einn af þeim fjórum vinnuhópum sem skipaðir voru ákvað að bjóða til þessa opna vinnufundar.

Ýmsum spurningum og hugmyndum var velt upp á fundinum og fóru fram líflegar og áhugaverðar umræður. Vinnuhópurinn mun fara yfir allt sem kom fram á fundinum og vinna samantekt, sem verður birt á vef KSÍ og deilt með aðildarfélögum innan fárra daga.