Stjórn knattspyrnudeildar Vals og Eiríkur Þorvarðarson hafa komist að samkomulagi um að Eiríkur verði í þjálfarateymi meistaraflokks Vals í knattspyrnu karla til næstu 3ja ára sem markmannsþjálfari.

Eiríkur sem er sálfræðingur að mennt lék á árum áður með Breiðablik, HK, Víking og Sindra á að baki 13 leiki með U19 og U16 ára landsliðum Íslands. Eiríkur hóf sinn þjálfaraferil í Fram 2005 en ári síðar gekk hann til liðs við FH þar sem hann var í 14 ár og vann með félaginu 6 Íslandsmeistaratitla og 2 bikarmeistaratitla.

Eiríkur og Heimir sameina þar með krafta sína saman að nýju en þeir störfuðu áður saman hjá FH. Heimir var ráðinn þjálfari Vals á dögunum.

„Mjög ánægður að fá tækifæri með Val og vinna í því metnaðarfulla umhverfi sem félagið hefur skapað og vinna með öllu því góða fólki sem er í félaginu,“ sagði Eiríkur um nýja starfið en hann fór frá FH á dögunum.

Heimir fagnar komu Eiríks. „Við Eiríkur höfum áður átt í samstarfi sem var farsælt og gott og það er frábært að fá tækifæri á að vinna saman að nýju“