Óskar Hrafn Þorvaldsson var í dag ráðinn þjálfari Breiðabliks, til næstu fjögurra ára. Óskar sagði upp hjá Gróttu.

Óskar vann frábært starf með Gróttu, á tveimur árum fór liðið upp úr 2. deild og í sumar úr 1. deildinni, magnaður árangur með ungt lið.

,,Stjórn deildarinnar lagði mikið í sölurnar til að tryggja áframhaldandi veru Óskars Hrafns í herbúðum félagsins, en virðir ákvörðun hans,“ segir í yfirlýsingu Gróttu.

Yfirlýsing Gróttu:
Í morgun tilkynnti Óskar Hrafn Þorvaldsson okkur að hann hefði ákveðið að segja upp samningi sínum við Gróttu og sigla á önnur mið. Stjórn deildarinnar lagði mikið í sölurnar til að tryggja áframhaldandi veru Óskars Hrafns í herbúðum félagsins, en virðir ákvörðun hans. Óskar vann frábært starf hjá félaginu, sem við þökkum honum fyrir hönd leikmanna, starfsfólks, stjórnar og stuðningsmanna. Unnið er að ráðningu eftirmanns hans í starfið.

Framundan er spennandi ævintýri fyrir hið unga og hugrakka lið félagsins. Við finnum þann mikla meðbyr sem er með liðinu og starf okkar næstu misseri miðar að því að undirbúa drengina eins og best verður á kosið fyrir Pepsi max deildina. Allt Gróttufólk stendur þétt við bakið á sínum mönnum og mun mæta þeim nýju áskorunum sem bíða.