Gary Martin, leikmaður ÍBV, mun skrifa undir lánssamning við annað félag ef hann verður áfram hjá ÍBV.

Þetta staðfesti leikmaðurinn í samtali við Fótbolta.net í dag en hann var gestur í hlaðvarpsþætti miðilsins.

Gary ætlar að gera samning við Darlington í janúar en það lið leikur í Vanarama north deildinni.

Það er sjötta hæsta deild Englands en Gary er mikill stuðningsmaður liðsins og á vini í liðinu.

Íslenska deildin fer ekki af stað fyrr en næsta sumar og myndi Gary því koma sjóðandi heitur til leiks.

Gary staðfesti það að hann myndi semja í janúar og fara svo aftur til Eyja þann 1. apríl.