KR er Íslandsmeistari Pepsi Max-deildar karla árið 2019 en þetta varð ljóst eftir leiki kvöldsins.
KR mætti Íslandsmeisturum síðasta árs í Val og höfðu betur með einu marki gegn engu á Hlíðarenda.
Pálmi Rafn Pálmason sá um að tryggja þeim svarthvítu sigurinn en tvær umferðir eru eftir í mótinu sjálfu.
KR er með 46 stig á toppi deildarinnar en Breiðablik er í öðru sætinu með 37 eftir leik við Stjörnuna.
Hér má sjá það góða og slæma úr leik kvöldsins.
Plús:
Það er magnað afrek fyrir KR að vinna deildina í ár, KR hefur oft verið með betri mannskap. Liðið hefur hins vegar haldið velli í allt sumar, spilaðan agaðan og stöðugan leik.
Rúnar Kristinsson er að gera KR að Íslandsmeisturum á öðru tímabilinu í endurkomunni, hann tók við liði sem var í veseni Hann hefur náð því besta fram úr hverjum einasta manni.
Sigurinn er sætur fyrir Pálma Rafn Pálmason, hann hafði upplifað erfiða tíma í KR. Hann tók á sig launalækkun til að klára hið ókláraða verk eins og hann orðaði það. Verkið var klárað í kvöld, Pálmi var síðast Íslandsmeistari árið 2007 með Val.
Þeir hafa kannski ekki fengið mesta hrósið en Arnór Sveinn Aðalsteinsson og Finnur Tómas, í hjarta varnarinnar. Hafa verið magnaðir í sumar. Eitt besta miðvarðar par sem ég man eftir í efstu deild.
Mínus:
Kvöldið kórónar vont tímabil Vals, þeirra erkifjendur verða Íslandsmeistarar á þeirra heimavelli og vonir um Evrópusæti nánast úr sögunni.
Kvöldið er líka vont fyrir Hannes Þór Halldórsson, landsliðsmarkvörð. Hann gat valið að fara í KR þegar hann kom heim í apríl. Hann valdi Val og situr uppi með sárt ennið.
