,,Hvað er að gerast með Þrótt?,“ sagði Hjörvar Hafliðason, sérfræðingur Dr. Football um ástandið í Laugardalnum. Þetta stóra félag er á barmi þess að falla niður í 2. deild karla.
Þróttur situr í fallsæti næst efstu deildar þegar ein umferð er eftir, tapi liðið fyrir Aftureldingu í síðasta leik er þetta stór félag fallið. Þróttur hefur tapað sex leikjum í röð, ,,Þróttur er í einhverju ævintýralegasta rugli sem ég hef séð. Ég sé ekki annað en að Afturelding vinni Þrótt,“ sagði Mikael Nikulásson, um ástandið í Laugardalnum.
Kötturinn, Hrafnkell Freyr Ágústsson fór að hlera menn í Laugardalnum. ,,Ég fór á stúfana, böggaði nokkra Þróttara sem ég þekki. Spyrja hver fjandinn væri í gangi, ég horfi á liðið. Þetta er fínt lið, ég spurði hvað væri í gangi. Mórall frá fyrstu umferð verið í fokki, sögðu þeir.“
Þá fór Hrafnkell að tala um þegar Þórhallur Siggeirsson, þjálfari Þróttar vildi losna við Gunnar Gunnarsson. Hann neitaði að spila honum og vildi hann ekki á æfingar í upphafi móts, Gunnar fór á endanum. ,,Þetta mál með Gunna Gunn, fór mjög illa í mannskapinn. Hann var stór persónuleiki í hópnum, það fór ekki vel í menn. Ég held að þetta sé grunnurinn að vandamálinu.“
Mikael var ekki sammála Kela um gæði Þróttar og efast um Þórhall þjálfara, sem er í sínu fyrsta starfi í meistaraflokki. Það hefur ekki gengið vel. ,,Ég held að leikmennirnir séu ekki nógu góðir, ef þeir væru svona rosalega góðir. Þá væru þeir ekki í þessari stöðu.“
,,Ég þekki þennan gæa ekki neitt, af hverju er hann svona frábær þjálfari?,“ sagði Mikael og fékk þau svör frá Kettinum og Hjörvari að Þórhallur hefði verið farsæll þjálfar í yngri flokkum.
Mikael svaraði. ,,Í yngri flokkum? Mér er alveg sama um það, við erum að tala um meistaraflokk Þróttar. Það sem hann hefur sýnt mér, þá er hann langt í frá frábær þjálfari. Hann hefur ekkert erindi í þetta. Þeir geta haldið sér uppi, en ég held að Afturelding vinni.“
,,Þetta er ævintýralegt þetta Þróttara dæmi.“
Umræðuna má heyra hér að neðan.
