Heimir Guðjónsson er ekki á leið aftur til Íslands eins og staðan er en hann hefur ekki tekið neina ákvörðun.

Þetta staðfesti Heimir í samtali við RÚV í dag en sögusagnir hafa verið í gangi um að Heimir sé á heimleið.

Undanfarið hefur Heimir starfað fyrir HB í Færeyjum og gerði hann liðið að meisturum á fyrsta tímabili.

„Ég hef ekki tekið neina ákvörðun um framhaldið, allar þessar sögusagnir sem hafa verið hérna heima eiga ekki við rök að styðjast. Mótið í Færeyjum klárast ekki fyrr en 21. október, ég á bikarúrslitaleik 21. september þannig að ég er að einbeita mér að því,“ sagði Heimir við RÚV.

,,En auðvitað er þetta alltaf þannig að þegar þú lýkur samningi þá skoðar þú hvort það séu einhverjir möguleikar að gera eitthvað annað. En mér hefur liðið vel í Færeyjum, fjölskyldunni hefur liðið vel og það er fínt að búa þar.“

Heimir tekur því rólega þessa stundina og þvertekur augljóslega fyrir það að hann sé búinn að semja við íslenskt félag.