Dr. Football, hlaðvarpsþátturinn er oft að vaða í tæklingarnar sem aðrir þori ekki í. Í dag var rætt um Guðmund Þórarinsson, leikmann Norköpping í Svíþjóð. Guðmundur er ekki í nýjasta landsliðshópi Íslands. Liðið mætir Moldóvu og Albaníu í undankeppni EM á næstu dögum.

Þau tíðindi koma þá fáum á óvart enda hefur Guðmundur aldrei átt sæti í landsliðshópnum. Guðmundur hefur spilað fimm A-landsleiki, allir hafa komið í janúar þegar bestu leikmenn liðsins eru ekki gjaldgengir. Flokka mætti leikina sem B-landsleiki.

Guðmundur hefur verið frábær með Norköpping í ár og stærri lið hafa áhuga á honum. Í Dr. Football skilja menn ekki af hverju hann er ekki í 23 manna hóp, Erik Hamren.

,,Gummi Tóta á að vera þarna, hann getur bæði spilað sem vængbakvörður og á miðjunni. Ég skil þetta ekki, hann er betri en margir þarna inni,“ sagði Kristján Óli Sigurðsson, stundum nefndur Höfðinginn.

Mikael Nikulásson, hefði viljað sjá Guðmund byrja í landsliðinu, hið minnsta síðari leikinn gegn Albaníu.

,,Gummi Tóta fyrir mér, við erum með Gylfa og Aron. Emil Hallfreðsson er ekki að spila neitt, fyrir mér ætti Gummi að vera mögulegur byrunarliðsmaður gegn Albaníu. Þar sem við þurfum að þétta, hann er ekki í hóp.“

Guðmundur fékk aldrei tækifæri undir stjórn Heimis Hallgrímssonar og Lars Lagerback og Erik Hamren er á sömu blaðsíðu. Heimir fékk Guðmund til ÍBV árið 2011 og vann með honum þar.

,,Þetta var eitthvað persónulegt frá Heimi Hallgrímssyni, til að byrja með. Frá tímanum í Vestmannaeyjum, það er klárt. Ég hef heyrt það, annað kæmi mér á óvart. Gefðu mér fram í næsta þátt til að finna út um ástæðu Hamren, ég ætla að hringja nokkur símtöl. Þetta er fáránlegt.“