Mesut Özil, leikmaður Arsenal, lenti í óhugnanlegu atviki í miðborg London í gær.

Tveir vopnaðir menn réðust að þýska miðjumanninum sem náði að komast burt þökk sé liðsfélaga sínum, Sead Kolasinac.

Kolasinac slóst við mennina vopnaður aðeins hnefunum og flúðu þeir vettvang skömmu síðar.

Özil leitaði hjálpar á veitingastað stuttu síðar og bað eigandann um að hringja strax í lögregluna.

Yagmur Cicek er eigandi staðarins en hún þekkir Özil vel og tjáði sig um hvað átti sér stað.

,,Þetta byrjaði allt í smá fjarlægð frá veitingastaðnum. Fyrst þá réðust árásarmennirnir að bíl Özil með steinum,“ sagði Cicek,

,,Özil kom strax til okkar og sagði okkur að hringja í lögregluna. Við gerðum það og eftir á þá komust þau í skjól til okkar.“

,,Özil var mjög rólegur en konan hans var hrædd og ég vorkenni henni mikið.“

,,Ég hef þekkt Özil í langan tíma og ég elska hann. Hann er frábær strákur, hann er eins og sonur minn. Ég myndi gera allt fyrir hann.“

,,Ég myndi jafnvel gefa líf mitt fyrir hann því ég elska Özil svo mikið. Við erum eins og fjölskylda.“