Neymar, leikmaður Paris Saint-Germain, hefur nefnt þann varnarmann sem er erfiðast að spila við.

Neymar hefur oft spilað við frábæra varnarmenn en hann var lengi á mála hjá Barcelona.

Þar spilaði Brassinn reglulega við Sergio Ramos sem er fyrirliði Real Madrid og þykir vera einn besti varnarmaður heims.

Neymar segir að það sé alls ekki auðvelt að spila gegn Ramos sem á það til að skora mjög mikilvæg mörk.

,,Besti varnarmaður sem ég hef mætt? Sergio Ramos. Hann er frábær varnarmaður og hann skorar líka mörk. Það er mjög erfitt að spila gegn honum,“ sagði Neymar.

Neymar gæti spilað við Ramos á næstu leiktíð en hann er sterklega orðaður við endurkomu til Spánar.