,,Hvað er í gangi í Krikanum? Nákvæmlega ekki neitt, það er ekkert að gerast,“ sagði Kristján Óli Sigurðsson, sérfræðingur Dr Football um stöðu FH og hvað væri í gangi í Kaplakrika á mánudag.

Davíð Þór Viðarsson, fyrirliði FH var ómyrkur í máli eftir tap FH gegn KR í Pepsi Max-deild karla á sunnudag. FH tapaði þá á heimavelli og er staða liðsins slæm. FH er með 12 stig í deildinni, langt undir væntingum. Liðið er nú 11 stigum á eftir toppliði KR. Fótbolti.net sagði frá því fyrir helgi að vandræði væru með launagreiðslur til leikmanna FH og að leikmenn hefðu í raun farið í verkfall, til að láta vita óánægju sinni. Morgunblaðið spurði Davíð út í málið. Hann sendi væna pillu á þá sem hafa rætt og ritað um málið. „Þetta er bara vit­leys­ing­ar sem þurfa að tjá sig um allt og alla á Twitter og menn sem hafa mis­mikið vit á fót­bolta. Það er gott að þeir hafi ein­hvern vett­vang til að tjá sig,“ sagði Davíð Þór

Kristjáni svaraði þessum ummælum Davíðs í þætti vikunnar í Dr. Football. ,,Davíð Þór Viðarsson tjáir sig, ef ég er vitleysingur. Ef Davíð þykist hafa vit á fótbolta sjálfur, þá hefði hann hætt fyrir tveimur árum. Hann er ekki skugginn af sjálfum sér, var frábær á sínum tíma. Mér fannst hann ekki frábær í gær, skokkaði um í miðju hringnum, reif kjaft og tuðaði,“ sagði Kristján í þætti dagsins.

,,Hann átti að hætta fyrir tveimur árum í stað þess að mjólka klúbbinn sinn að innan, svona er boltinn. Menn vilja salt í grautinn, ég skil það vel. Davíð er að kasta steinum úr glerhúsi.“

Davíð var spurður út í þessu ummæli Kristjáns af Morgunblaðinu í gær eftir góðan sigur á Grindavík í bikarnum. „Auðvitað les maður frétt­irn­ar og maður heyr­ir ákveðna hluti hér og þar um það sem sagt er hverju sinni. Per­sónu­lega þá hef­ur þetta um­tal ekki mik­il áhrif á mig þótt það sé ým­is­legt sem maður læt­ur út úr sér í viðtöl­um sem fer und­ir skinnið hjá ákveðnum mönn­um,“ sagði Davíð við Morgunblaðið.

,,Ég ætla ekki að tjá mig um ein­hver ein­staka um­mæli um mig, mönn­um er frjálst að hafa sína skoðun, en það var eitt­hvað talað um að ég hefði verið fast­ur í miðju­hringn­um í ein­um leikn­um og ég held að ég hafi hlaupið ein­hverja sex kíló­metra í þeim ákveðna leik,“ sagði Davíð Þór í sam­tali við mbl.is.