Stjarnan hefur staðfest að Þórarinn Ingi Valdimarsson hafi slitið krossband. Að auki urðu áverkar á liðböndum.

Þórarinn meiddist snemma leiks gegn Fylki í Pepsi Max-deild karla um liðna helgi, hann þurfti að yfirgefa völlinn með sjúkrabíl.

Ljóst er að Þórarinn Ingi leikur ekki meiri knattspyrnu á þessu ári en óvíst er hversu langan tíma bataferlið verður.

Yfirlýsing Stjörnunnar:
Nú hefur verið staðfest að Þórarinn Ingi Valdimarsson sem ekið var á brott í sjúkrabíl eftir meiðsli sem hann hlaut í leik gegn Fylki síðastliðinn sunnudag eru alvarleg og verður hann lengi frá. Myndataka hefur leitt í ljós að bæði sin og krossband höfðu gefið sig í hægra hné auk þess sem áverkar urðu á liðböndum. Við óskum Tóta góðs gengis í endurhæfingunni og hlökkum til að sjá hann á vellinum næsta sumar.