Riyad Mahrez, leikmaður Manchester City hefur verið dæmdur til að greiða konu sem passaði börnin hans, 3,612 pund. Mahrez hafði neitað að borga konunni launin sín.

Cathy Miraflores, frá Filippseyjum hafði passað börn Mahrez um langt skeið. Það var hins vegar í nóvember í fyrra sem hann hætti að borga launin hennar.

,,Hann er svindlari, ég vann öllum stundum. Ég vildi bara fá launin mín,“ sagði Cathy við ensk blöð. Mahrez kostaði Englandsmeistara City, 60 milljónir punda fyrir ári síðan.

Mahrez þénar sjálfur 200 þúsund pund á viku, rúmar 30 milljónir króna. ,,Ég var til taks allan sólarhringinn, ég svaf í sama herbergi og börnin, ef þau vöknuðu, þá sá ég um það.“

,,Ég fór aldrei heim, ég var öllum stundum hjá þeim í Manchester. Það voru aldrei vandræði með vinnu mínu, ég á bara að fá laun fyrir það sem ég gerði.“

Cathy fékk 12 pund á tímann. ,,Ég vil ekki skemma orðspor hans, ég vil bara launin,“ sagði Cathy sem hafði unnið hjá Mahrez frá því í mars í fyrra.

Cathy hafði frá því í nóvember reynt að rukka launin, Mahrez rak hana úr starfi og hætti að svara henni.

Í janúar ákvað Cathy að fara með málið fyrir dómara og það var í gær sem henni var dæmdur sigur. Mahrez þarf að borga henni 572 þúsund krónur, í hvelli.