Kári Árnason skrifaði í dag undir eins og hálfs árs samning við uppeldisfélag sitt, Víking.
Kári er að koma heim úr atvinnumennsku en hann hefur síðustu 15 ár, leikið erlendis.
,,Það er ekki nein klásúla um að ég geti farið ef það kemur tilboð, ég er mættur heim,“ sagði Kári Árnason við 433.is, eftir að hafa skrifað undir.
Kári hefur búið erlendis 17 ár af þeim 36 sem hann hefur lifað, hann er ánægður að flytja aftur heim.
,,Ég er mjög ánægður með þetta, það var kominn tími á þetta. Ég er búinn að vera úti í 17 ár, 15 ár í atvinnumennsku og háskóla fyrir það. Það er gott að vera mættur heim og geta einbeitt sér að fótbolta strax.“
Kári sér ekki eftir neinu á ferli sínum en hefði viljað spila fyrir betri félagslið.
,,Auðvitað eru hér og þar ákvarðanir sem hefðu getað farið betur, maður hefði átt að gera kröfu á betri lið. Mér fannst alltaf eins og ég hefði getað spilað fyrir betri félagslið, ég sé ekki eftir neinu.“
Kári á fast sæti í byrjunarliði Íslands, hann er meðvitaður um að heimkoman gæti haft áhrif það.
,,Ég var semi hættur eftir HM, en var beðin um að halda áfram. Allt gott og blessað með það. Svo er maður mættur í byrjunarliðið aftur og þá vill maður halda áfram, halda áfram að ná árangri. Þetta skref, maður er smeykur við það. Það eru leikmenn að spila í betri liðum og betri deildum. Ég talaði stuttlega við þá um þetta, þetta er undir mér sjálfum komið.“
Viðtalið er í heild hér að neðan.
