Loris Karius, markvörður Liverpool á Englandi, hafnaði boði félagsins um að mæta á úrslitaleik Meistaradeildarinnar.

Frá þessu er greint í dag en Liverpool spilar við Tottenham í úrslitunum á morgun.

Karius er samningsbundinn Liverpool en hefur spilað með Besiktas á láni undanfarna mánuði.

Karius lék með Liverpool í úrslitum Meistaradeildarinnar í fyrra og gerði slæm mistök er liðið tapaði gegn Real Madrid.

Hann hefur engan áhuga á að mæta á leikinn í Madríd á morgun og kýs frekar að eyða tíma með kærustu sinni.

Karius var lánaður til Besiktas til tveggja ára og má félagið því halda honum á næstu leiktíð.

Myndir náðust af Karius og kærustu hans í gær þar sem má sjá þau skemmta sér á ströndinni í Grikklandi.