Friðrik Dór Jónsson, hefur í mörg ár verið einn allra vinsælasti tónlistarmaður Íslands. Friðrik hefur gefið út mikið af lögum sem slegið hafa í gegn. Það var árið 2009 sem Friðrik kom fram í sviðsljósið fyrir framan alþjóð.
Ástæða þess að Friðrik fór á fullt í tónlist er áhugaverð, hann átti sér draum um að ná langt í fótbolta en hæfileikarnir þar, virðast hafa verið af skornum skammti.
,,Ég man alltaf eftir því, þetta sumar 2009. Ég var alltaf í fótbolta, þarna er ég að verða 21 árs. Eftir 2. flokkinn, þá hætti ég í eitt ár. Þá hringdi ég í Heimi (Heimir Guðjónsson, þá þjálfari FH), FH lang besta lið landsins. Ég spurði hvort það væri ekki séns að ég myndi byrja aftur með þeim, hann af óskiljanlegum ástæðum, sagði komdu bara. Ég var 7 kílóum of þungur til að vera í Pepsi deildinni,“ sagði Friðrik í viðtali á dögunum við Milliveginn.
Friðrik æfði með FH í nokkra mánuði þegar honum varð ljóst að hann ætti ekki séns þar.
,,Ég fer þarna og klára undirbúningstímabilið með FH, ég átti þá hressandi spjall við Heimi. Hann var að segja mér að það væri ekki mikil framtíð fyrir mig í félaginu, hann sagði ´Þú ert ekki mjög snöggur, þú gætir verið betri á boltann´. Hann taldi upp alla þætti leiksins, sem vantaði upp á hjá kallinum.“
Þá var komið að hressandi fundi þar sem hreinlega var logið upp í opið geð Friðriks, eitthvað sem hann erfir þó ekki.
,,Framkvæmdarstjóri á þessum tíma, Pétur Stephensen, mikill meistari. Hann sagði mér að ÍR sem Guðlaugur Baldursson var að þjálfa, mikill FH-ingur. Þeir væru ólmir að fá mig, ég fer þangað. Æfi og æfi, finnst ég ekkert mikið verri en aðrir. Ég er hins vegar aldrei hóp, eftir 3-4 vikur fer ég til Lauga og spyr hvað sé í gangi. Laugi sagðist ekki skilja af hverju ég væri að koma í ÍR, þá var Pétur bara að ljúga að mér. Vildi bara losa mig,“ sagði Friðrik og hafði gaman af því að segja söguna.
,,þetta eru tvö eftirminnilegustu spjöll sem ég hef átt. Við Heimi og Lauga, þá nennti ég þessu ekkert mikið lengur. Þá var ég tilbúinn með Hlið við hlið, þá sagðist ég ætla að verða besti tónlistarmaður á Íslandi.“
Spjallið við Friðrik má heyra hér að neðan.
