Margir stuðningsmenn Chelsea eru undrandi þessa stundina eftir ummæli fyrrum knattspyrnumannsins Dean Saunders.

Saunders lék á sínum tíma með Liverpool en hann ræddi við útvarpsstöðina TalkSport í gær.

Þar ræddi Saunders framtíð vængmannsins Callum Hudson-Odoi sem er á mála hjá Chelsea og er einnig hluti af enska landsliðinu.

Bayern Munchen vill fá Hudson-Odoi í sínar raðir í sumar en Saunders er með annað ráð fyrir þennan 18 ára gamla strák.

,,Hudson-Odoi þarf að vera áfram hjá Chelsea. Hann þarf að fylgjast með Eden Hazard, Willian og Pedro og læra af þeim,“ sagði Saunders.

,,Hann fær að spila af og til og svo á næsta ári ætti hann að fara á lán í ensku Championship-deildina eða í League One og spila gegn karlmönnum.“

Það eru heldur betur skrítin ummæli en það er ólíklegt að enskur landsliðsmaður reyni fyrir sér í þriðju efstu deild Englands.