,,Þegar við erum 1-0 undir, þó við höfum ekki verið að spila vel í dag þá erum við alltaf inni í leiknum,“ sagði Ragnar Sigurðsson, leikmaður Íslands í kvöld eftir 4-0 tap gegn Frökkum í undankeppni EM.

,,Svo þegar þetta er orðið 2-0 eða 3-0 þá kemur það fyrir að liðið missir einbeitinguna og fer að gera klaufaleg mistök og þá opnast allt ennþá meira.“

,,Ég veit ekki hvernig á að lýsa því. Þetta var bara klúður.“

Ragnar var spurður út í leikkerfi Íslands í kvöld en við lékum með fimm í öftustu línu. Hann viðurkennir að það gæti hafa spilað hlutverk í tapinu.

,,Það getur verið, ég held að það séu ekki margir að spila þessa taktík hjá sínum félagsliðum. Það getur verið erfitt að breyta um taktík en ég ætla ekki að skella allri sökinni á það.“

,,Við vorum ekki nógu góðir í dag og þeir voru helvíti góðir í að klára færin sín.“

,,Við náðum að æfa kerfið aðeins en ég vil helst ekki vera að tala um taktíkina hérna. Við reyndum að gera okkar besta og það gekk ekki upp í dag.“