Gylfi Þór Sigurðsson viðurkennir að leikur kvöldsins gegn Frakklandi í undankeppni EM hafi verið mjög erfiður.
Frakkar eru eitt sterkasta landslið heims og unnu sannfærandi 4-0 heimasigur á Stade de France.
Gylfi ræddi leikinn stuttu eftir lokaflautið en hann var mjög hrifinn af því hvernig heimsmeistararnir spiluðu.
,,Ég hugsaði fyrst um hversu góðir þeir væru. Þeir eru frábært lið sóknarlega og varnarlega. Hvernig þeir hreyfa boltann og hreyfingar án boltanns eru í fyrsta klassa. Þetta er bara eitt af bestu liðum heims í dag,“ sagði Gylfi.
,,Auðvitað vorum við inni í leiknum í 1-0 en þeir höfðu séns á að skora 2-3 í fyrri hálfleik – þetta var mjög erfitt sóknarlega. Við vorum það djúpir varnarlega að þegar við unnum loksins boltann, að sækja eða spila fram þá voru flestir bara inni á okkar vallarhelmingi.“
,,Það teygðist kannski aðeins úr þessu í stöðunni 2-0 þegar við fengum smá sénsa en þá bjóðum við hættunni heim á móti.“
,,Þetta var auðvitað mjög erfitt fyrir mig og Albert. Albert gerði vel nokkrum sinnum að hlaupa upp í horn og vinna innköst og aukaspyrnur en þetta var mjög erfitt.“
,,Við vorum langt frá hvorum öðrum, vitandi það fyrir leikinn að þeir myndu halda boltanum vel og sækja vel en við vorum kannski aðeins of djúpir.“
