Hörður Snævar Jónsson skrifar frá París:
Íslenska landsliðið átti ekki séns, þegar liðið heimsótti besta lið í heimi, Frakkland í undankeppni EM í París í kvöld.
Íslenska liðið reyndi sitt besta en það dugði ekki til, Frakkar eru númeri of stórir eins og staðan er í dag.
Samuel Umtiti kom heimamönnum yfir í fyrri hálfleik með skalla eftir fyrirgjöf frá Kylian Mbappe. Það var svo í síðari hálfleik sem Olivier Giroud komm heimamönnum í 2-0. Mbappe bætti svo við þriðja markinu á snyrtilegan hátt.
Antoine Griezmann kláraði svo leikinn með fjórða markinu, Ísland átti aldrei séns.
Einkunnir úr leiknum eru hér að neðan:
Byrjunarlið Íslands:
Hannes Þór Halldórsson 4
Mistök hans í marki númer tvö voru dýr, markið sem drap leikinn.
Birkir Már Sævarsson 5
Lenti á eftir Kylian Mbappe í þriðja markinu, hans einu mistök í leiknum.
Kári Árnason 5
Þrátt fyrir að liðið hafi fengið á sig fjögur mörk, var Kári með ágætis leiks.
Ragnar Sigurðsson 5
Ragnar byrjaði vel en eitthvað hvarf af einbetingu hans þegar líða tók á.
Sverrir Ingi Ingason 4
Sofandi í marki Umtiti, þarf að fara að sanna hvað hann getur í raun og veru með landsliðinu.
Hörður Björgvin Magnússon 4
Var klaufalegur í aðdraganda marksins sem Umtiti skoraði, mætti stundum halda einbeitingu betur. Var svo kominn úr stöðu þegar annað markið kom.
Aron Einar Gunnarsson 6 – Maður leiksins
Klókur fyrirliði, var afar öflugur á þessum erfiða útivelli. Kann að spila þessa stóru leiki.
Birkir Bjarnason 5
Birkir var öflugur í fyrri hálfleik en það dróg verulega af honum þeim síðari.
Rúnar Már Sigurjónsson (´57) 5
Komst ágætlega frá sínu en vantar kannski aðeins meiri leikæfingu til að keppa við bestu leikmenn heim.
Gylfi Þór Sigurðsson 4
Virtist hreinlega vera meiddur, virkaði tæpur fyrir leik og náði aldrei takti.
Albert Guðmundsson (´62) 6
Átti afar góðan fyrri hálfleik, var oft einmanna en gerði bara vel með boltann. Þessi leikur kemur honum framar í röðina þegar Hamren velur í liðið.
Varamenn:
Arnór Ingvi Traustason (´57) 4
Kom inn á miðja miðjuna sem er ekki hans staða og var í vandræðum.
Alfreð Finnbogason (´62) 4
Komst aldrei í takt við leikinn.
