Lars Lagerback, þjálfari Noregs og fyrrum landsliðsþjálfari Íslands virðist sakna þess að vinna í kringum íslenska fjölmiðla. Lagerback átti í góðu sambandi við íslenska fjölmiðla, en í Noregi fær hann öðruvísi meðhöndlun.

Hjólað var í Lagerback og nokkra leikmenn hans eftir 2-1 tap gegn Spáni í undankeppni EM í gær.

,,Ég var að hugsa um að ræða fótbolta, ef þið hefðuð áhuga á því,“ sagði Lagerback við norska fjölmiðla í dag, þegar hann ræddi við þá..

Lagerback er ósáttur með umfjöllun um liðið en liðið tapaði 2-1 gegn Spáni í gær og var Lagerback gagnrýndur fyrir skiptingar í leiknum.

,,Ég skoða yfirleitt ekki miðlana ykkar en ég varð að gera það í gær, eftir þær spurningar sem ég fékk.“

,,Starf mitt er að vinna leiki og búa til lið, ég hef virðingu fyrir ykkar starfi. Ég skoðaði viðbrögðin eftir leikinn í gær.“

,,Það er mitt starf að sjá til þess að leikmenn hlusti ekki á gagnrýni, sem á ekki rétt á sér. Eftir að hafa skoðað leikinn aftur er algjörlega galið að Håvard Nordtveit hafi fengið þessa útreið.“

Lagerback segir að fjölmiðlar á Íslandi vilji ræða um fótbolta en séu ekki að leita eftir því að taka menn af lífi, án þess að innistæða sé fyrir því. Lagerback var landsliðsþjálfari Íslands frá 2011 til 2016, og kom liðinu á sitt fyrsta stórmót.

,,Þetta er ekkert öðruvísi hérna, en miðað við Ísland, er þetta öðruvísi. Það var sérstakt, Ísland er einstakt. Ég hef upplifað það sama með fjölmiðla í Svíþjóð og Nígeríu, það var mikið skrifað. Á Íslandi vinna blaðamenn eins og þeir voru þegar ég var ungur maður, þeir hafa áhuga á fótboltanum og reyna að skilja hugmyndafræði liðsins.“