Íslenska karlalandsliðið spilar nú við Andorra en leikið er í undankeppni EM og fer leikurinn fram ytra.

Seinni hálfleikur fer senn að hefjast en staðan er 1-0 fyrir strákunum okkar eftir fyrri hálfleik.

Það var Birkir Bjarnason sem skoraði eina mark fyrri hálfleiks með skalla af stuttu færi eftir hornspyrnu.

Andorra er alls ekki með sterkt landslið og gæti íslenska liðið vel bætt við öðru marki í seinni hálfleik.

Bjarni Guðjónsson er sérfræðingur RÚV á leiknum í kvöld og vill sjá breytingar í síðari hálfleiknum.

,,Þetta lið getur ekki neitt, verum alveg hreinskilnir þeir geta ekkert,“ sagði Bjarni.

,,Ég myndi vilja létta af liðinu í seinni hálfleik. Við verðum að taka lengri tíma í sóknirnar,“ bætti Bjarni við.

Ísland hefur verið mun meira með boltann hingað til en Andorra reynir að beita skyndisóknum.