Hörður Snævar Jónsson skrifar frá Peralada á Spáni

,,Við erum mjög spenntir, spenntir að byrja þessa undankeppni,“ sagði Gylfi Þór Sigurðsson, skærasta stjarna landsliðsins við fréttamenn fyrir æfingu landsliðsins á Spáni í dag.

Gylfi og félagar hans í landsliðinu undirbúa sig fyrir leik gegn Andorra á föstudag. UM er að ræða fyrsta leik liðsins í undankeppni EM, á mánudag er svo leikur við Frakkland.

Greint var frá því í vikunni að Aron Einar Gunnarsson væri að ganga í raðir Al-Arabi í Katar. Aron mun hefja leik með Heimi Hallgrímssyni og félögum í sumar.

,,Fínt fyrir hann, eins og við höfum oft rætt þetta. Hann hefur verið í næst efstu deild Englands í mörg ár, og það tekur mjög mikið á. Hann finnur fyrir því, spenanndi tímar fram undan hjá honum. Vonandi líður honum vel í sólinni,“ sagði Gylfi um þetta skref Arons.

Gylfi segir að Aron sé meðvitaður um það að passa sig ekki að brenna ekki, húðin hans sé ekki gerð fyrir mikla sól.

,,Hann er ekki gerður fyrir heitu löndin, hann veit af því sem betur fer. Þeir æfa seint á daginn, þannig að þetta sleppur vonandi hjá honum.“

Viðtalið við Gylfa má heyra í heild hér að neðan.