Hörður Snævar Jónsson skrifar frá Peralada:

Rúnar Már Sigurjónsson er hluti af íslenska landsliðshópnum sem spilar við Andorra og Frakkland í vikunni.

Rúnar spilar með Grasshopers í Sviss þar sem erfiðlega hefur gengið á þessu tímabili.

Miðjumaðurinn hefur verið að glíma við meiðsli en orðinn heill. Hann var frá í rúmlega hálft ár vegna þess.

,,Þetta hafa verið undanfarnir sex mánuðir. Aðgerð fyrst og svo meiðist ég í jólafríinu svo það er frábært að vera kominn aftur,“ sagði Rúnar.

,,Ég var bara úti að hlaupa og fékk rifu í kálfann og svo var það greint vitlaust alveg frá byrjun. Eitthvað sem tók 3-4 vikur tók níu vikur í heildina.“

,,Ég missti af mörgum leikjum í byrjun og liðið var í vondri stöðu sem gerði þetta erfiðara. Nú er maður kominn til baka og vonandi helst maður heill.“

,,Ég er í fínu standi en liðinu gengur illa og það er hundleiðinlegt hvernig hefur gengið. Það eru 11 leikir og nóg af stigum eftir, við verðum að vera bjartsýnir.“

,,Það bendir fátt til þess að við séum að fara að snúa þessu við en maður verður að vera bjartsýnn og það hafa verið framfarir í síðustu tveimur leikjum.“

Rúnar er bjartsýnn fyrir komandi verkefni og er ánægður með að fá tækifæri í hópnum.

,,Ég fékk að spila í Þjóðadeildinni og í vináttuleik gegn Frökkum þó úrslitin hafi flest ekki verið eins og við vildum.“

,,Ég stefndi alltaf á að vera klár fyrir þetta verkefni og ég er mjög ánægður með að vera hérna.“

,,Ég hef ekki spilað marga mótsleiki áður enda unnum við flesta leiki fyrir nokkrum árum síðan. Ég reyndi að gera mitt og vonandi hef ég stimplað mig ágætlega inn.“

,,Síðasta ár er búið og við þurfum ekki að pæla í því meira. Nú er ný undankeppni að byrja og stór séns á að komast á EM 2020. Við stefnum allir á það sama.“