Aron Einar Gunnarsson hefur krotað undir samning við lið Al-Arabi í Katar og gengur í raðir liðsins í sumar.

Aron hefur undanfarin ár gert góða hluti með Cardiff í Wales en liðið leikur í ensku úrvalsdeildinni.

Hjá Al-Arabi mun Aron vinna með Heimi Hallgrímssyni, fyrrum landsliðsþjálfara, sem tók við í fyrra.

Aron segir að það hafi alltaf verið planið að vinna með Heimi á ný en þeir náðu frábærum árangri saman í landsliðinu.

,,Ég er hrikalega spenntur fyrir þessu. Þetta er uppbyggingarstarfsemi í þessum klúbbi og ég hef talað mikið við Heimi um hverju hann er að reyna að breyta,“ sagði Aron við Vísi.

,,Það er mjög spennandi. Ég er spenntur fyrir því að prófa eitthvað nýtt. Ég hef verið í 11 ár á Bretlandseyjum og það er komið gott. Ég vil prófa eitthvað nýtt á meðan maður getur.“

,,Þetta var eiginlega fyrsti og síðasti kosturinn fyrir mig, ég var ekki að spá í einhverju öðru þegar ég vissi að hann vildi fá mig. Hvort sem það hafi verið annars staðar eða ekki. Ég hefði hugsað um það að fá að vinna með Heimi aftur og hann vissi af því.“