Arnór Sigurðsson, leikmaður CSKA Moskvu og íslenska landsliðsins er einstaklega jarðbundinn drengur, þrátt fyrir að hafa skotist upp á stjörnuhiminn, á ógnarhraða er það ekki að sjá á pilti.
Arnór er mættur til Spánar til móts við íslenska landsliðið, þar er liðið að undirbúa sig undir fyrstu leikina í undankeppni EM. Liðið mætir Andorra á föstudag og spilar við Frakkland eftir vikur.
Arnór hefur slegið í gegn í Rússlandi en þangað var hann keyptur síðasta sumar. CSKA er líka að gera vel. ,, Það eru þrír leikir búnir, eftir að mótið fór af stað aftur og við erum í öðru sæti, þetta verður slagur fram í síðustu umferð og við ætlum að taka hann,“ sagði Arnór þegar blaðamaður ræddi við hann á Spáni í dag.
,,Það voru ekki gerðar svona miklar væntingar til okkar, það komu margir nýir ungir leikmenn inn fyrir tímabilið. Við vissum það sjálfir að við værum nógu góðir til að vera á þessum stað sem við erum.“
Arnór komst í heimsfréttirnar í desember þegar hann skoraði og lagði upp í ótrúlegum sigri liðsins á Real Madrid. Síðan þá hefur liðið verið í fríi, sem er fremur sérstakt á miðju tímabili.
,,Þetta er sérstakt, við enduðum mjög vel í Meistaradeildinni gegn Real Madrid og svo kemur bara tveggja mánaða pása. Þetta er sérstakt en partur af þessu,“ sagði Arnór en hann og liðsfélagar hans voru lengi á Spáni.
,,Við vorum bara á Spáni, það var orðið frekar þreytt í lokin,“ sagði Arnór sem er ánægður í Rússlandi.
,,Ég kann mjög vel við Moskvu, flott umhverfi og flott lið. Hjálpuðu mér að komast inn í hlutina, ég er ekki með tungumálið. Bara nokkur orð, skil orð og orð.“
Frammistaða Arnórs hefur vakið gríðar athygli, eins og fyrr segir og borist hafa fréttir af því að stórlið á bæði Ítalíu og Þýskalandi vilji kaupa hann í sumar, Arnór kippir sig ekki upp við það og er með báða fætur á jörðinni.
,,Maður hefur heyrt af þessu og séð þetta, mér líður vel í Moskvu. Ég er 100 prósent einbeittur þar,“ sagði Arnór sem viðurkenndi þó að þetta gefi smá auka kraft.
,,Það gefur manni auka kraft og hjálpar en mín einbeiting er hjá CSKA.“
