Pat van den Hauwe, fyrrum leikmaður Everton og Tottenham, átti farsælan feril sem knattspyrnumaður.

Þessi fyrrum landsliðsmaður Wales hóf ferilinn með Birmingham en lék síðar með Everton og Tottenham við góðan orðstír.

Ferill varnarmannsins var á mikilli niðurleið árið 1993 er Ossie Ardiles, þáverandi stjóri Tottenham, reyndi ítrekað að koma honum burt frá félaginu.

Van den Hauwe samdi við Millwall í kjölfarið þar sem lítið gekk upp og lagði hann svo skóna á hilluna ekki löngu seinna.

Eftir ferilinn byrjaði Van den Hauwe að selja eiturlyf en hann var þá búsettur í Suður-Afríku.

Hann opnaði sig í viðtali við the Daily Mail í dag þar sem hann greinir frá því að hann hafi verið nálægt því að fremja morð stuttu eftir að skórnir fóru í hilluna.

,,Ég var næstum því búinn að skjóta mann. Vegna hrokans í honum og vegna þess að hann neitaði að borga mér peninginn sem ég hafði lánað honum,“ sagði Van den Hauwe.

,,Ég var að fá mér drykki með vinum mínum þegar hann mætti. Ég öskraði: ‘Hvenær ætlaru að borga mér? Það eru liðnir margir mánuðir.’

,,Hann svaraði: ‘Hvað ætlarðu að gera í því?’ – ég vissi að hann væri með svarta beltið í karate. Átti ég að sveifla höndunum í átt að honum?“

,,Ekki séns. Ég labbaði upp að honum og miðaði byssu að höfði hans. ‘Hvar eru peningarnir mínir?’

,,Ég þurfti ekki að taka fast í gikkinn. Ég hefði sprengt á honum hausinn. Ef ég hefði gert það þá væri ég enn í fangelsi.“

,,Ef eitthvað hefði gerst á þessari stundu eða ef hann hefði reynt að ráðast á mig þá hefði ég skotið hann. Það munaði millisekúndum. Þetta breytti lífi mínu.“