Lið Liverpool spilaði ömurlega gegn Bayern Munchen í gær segir fyrrum leikmaður liðsins, Steve Nicol.

Nicol er goðsögn á Anfield en hann spilaði með liðinu frá 1981 til 1994 við góðan orðstír.

Liverpool vann 3-1 sigur á Bayern í gær á útivelli og fer áfram í 8-liða úrslit Meistaradeildarinnar.

Nicol segir að leikplan Bayern hafi ekki verið til staðar og að Liverpool hafi alls ekki spilað vel þrátt fyrir sigur.

,,Ég myndi elska að segja það að Liverpool hafi mætt til leiks og að þeir hafi bara verið of klárir fyrir Bayern,“ sagði Nicol.

,,Sannleikurinn er hins vegar að Bayern vissi ekki hvað þeir vildu gera. Í fyrri leiknum sátu þeir aftarlega og gáfu ekkert eftir.“

,,Á heimavelli, við héldum að þeir væru sigurstranglegri og bjuggumst við að þeir myndu keyra á Liverpool en þeir gerðu það ekki. Þeir biðu bara eftir einhverju.“

,,Ef þú horfir á tölfræðina, eina ástæðan fyrir því að þeir voru meira með boltann var því Liverpool gaf þeim hann alltaf til baka.“

,,Það hafði ekkert að gera með hvað þeir voru að gera. Liverpool voru ömurlegir á boltanum í þessum leik. Þeir voru eins slæmir og ég hef nokkurn tímann séð þá.“

,,Það sýnir þér að tölfræðin skiptir engu máli, það sem skiptir máli eru úrslitin og Liverpool vann 3-1.“