Hópur Íslands fyrir leikina gegn Andorra og Frakklandi í undankeppni EM 2020 verður kynntur á morgun, fimmtudag, kl. 13:00

Erik Hamren er að fara í sitt stærsta próf, hann hefur ekki unnið leik með liðið í átta tilraunum.

Hamren gekk illa í Þjóðadeildinni og æfingaleikirnir fjórir hafa ekki gengið vel.

Áhugavert verður að sjá hvaða 23 leikmenn Erik Hamren velur í hóp sinn, mörg spurningarmerki eru sem verður áhugavert að sjá hvaða leið sá sænski fari.

Í varnarlínunni er spurningarmerki með Kára Árnason sem var ekki í hóp hjá Gençlerbirliği í síðustu umferð í Tyrklandi. Líklegt er þó að þessi mikilvægi hlekkur verði með.

Emil Hallfreðsson og Theodór Elmar Bjarnason eru meiddir á miðsvæðinu og verða ekki með.

Stærstu spurningamerkin eru í framlínunni þar sem Alfreð Finnbogason hefur verið meiddur, spili hann með Augsburg um helgina í Þýskalandi getur hann tekð þátt í leikjunum. Viðar Örn Kjartansson ákvað að taka sér frí frá landsliðinu og verður ekki með í þessu verkefni.

Jón Daði Böðvarsson hefur verið fjarverandi hjá Reading og ólíklegt er að hann verði valinn. Albert Guðmundsson hefur lítið verið að spila hjá AZ Alkmaar en ætti að vera í hópnum.

Þá er Kolbeinn Sigþórsson án félags eftir að hafa rift samningi sínum við Nantes en hann hefur ekki spilað leik síðan í nóvember í síðasta verkefni hans með landsliðinu. Ólíklegt verður að telja að hann verði í þessum hópi.