Ole Gunnar Solskjær hefur unnið 13 af 16 leikjum sínum sem stjóri Manchester United, eina tapið kom gegn PSG í Meistaradeildinni.
Um var að ræða fyrri leik liðanna í 16 liða úrslitum en leikurinn fór fram á Old Trafford, United þarf því kraftaverk í París í kvöld.
Til að gera stöðuna verri eru mikil meiðsli í herbúðum United. Solskjær verður án Anthony Martial, Nemanja Matic, Phil Jones, Jesse Lingard, Juan Mata, Ander Herrera, Alexis Sanchez, Antonio Valencia, Matteo Darmian og Paul Pogba sem er í banni
Þetta hefur orðið til þess að Solskjær þarf nú að treysta á og nota unga leikmenn. Hann hefur gaman af því og fóru fimm slíkir með í ferðalagið til Parísar.
Búist er við að þrír eða fjórir af þeim verði í leikmannahópi liðsins í kvöld en hvaða menn eru þetta? Það má sjá hér að neðan.
Tahith Chong
Hægri kantmaðurinn kom frá Feyenoord árið 2016 og fór strax að æfa með aðalliðinu. Chong hefur verið á bekknum í Meistaradeildinni og spilaði sinn fyrsta leik í janúar gegn Reading í bikarnum. Hann spilaði sinn fyrsta leik í ensku úrvalsdeildinni um helgina gegn Southampton. Chong er 19 ára hollenskur kantmaður.
Angel Gomes
Fæddur í London en kom til United þegarhann var sex ára gamall, spilaði sinn fyrsta leik með aðalliðinu gegn Crystal Palace í maí árið 2017, þá aðeins 16 ára gamall.
Gomes er 18 ára gamall og hefur komið við sögu í bikarnum og Meistaradeildinni. Hann lék gegn Huddersfield í deildinni í kringum jólin.
Mason Greenwood
Þessi 17 ára framherji gerði sinn fyrsta atvinnumannasamning á þessu tímabili en á eftir að spila fyrir aðalliðið. Greenwood hefur raðað inn mörkum fyrir unglingalið United og iðulega spilað gegn eldri drengjum.
James Garner:
Miðjumaðurinn sem líkt er við Michael Carrick, hefur alla tíð spilað hjá United. Garner er 17 ára gamall og lék sinn fyrsta leik með aðalliðinu í síðustu viku gegn Crystal Palace.
Garner gekk í raðir United þegar hann var 8 ára gamall og hefur verið fyrirliði hjá U17 ára landsliði Englands.
Brandon Williams
18 ára bakvörður sem gekk í raðir United þegar hann var sjö ára gamall, hefur alltaf haldð með United og hefur spilað fyrir unglingalið félagsins.
Williams hefur aldrei spilað fyrir aðallið United.
