Gylfi Þór Sigurðsson átti frábæran leik fyrir lið Everton sem spilaði við Cardiff í Wales í gær.

Leikið er í ensku úrvalsdeildinni en leiknum lauk með sannfærandi 3-0 sigri gestanna frá Liverpool.

Gylfi skoraði tvö af mörkum Everton í leiknum og er kominn með 57 mörk í úrvalsdeildinni.

Gylfi var að skora sitt 11. mark í deildinni á tímabilinu og hefur jafnað eigið markamet sem kom tímabilið 2015/2016 með Swansea.

Miðjumaðurinn knái fer því fullur sjálfstrausts inn í grannaslaginn gegn Liverpool á sunnudag. Liverpool reyndi að kaupa Gylfa sumarið 2012, hann hafnaði liðinu til að ganga í raðir Tottenham.

Liverpool berst á toppi deildarinnar og gæti unnið deildina í fyrsta sinn í 29 ár, það kveikir í leikmönnum Everton að reyna að koma í veg fyrir það. ,,Að sjálfsögðu eykur það hungur okkar í sigur,“ sagði Gylfi þegar hann var spurður um hvort sú staðreynd að Liverpool væri á toppnum myndi kveikja í leikmönnum Everton, að þeir gætu skemmt fyrir liðinu.

,,Það skiptir samt aldrei máli hvar þeir eru í deildinni, þú ætlar alltaf að vinna þessa leiki. Sérstaklega eftir vonbrigðin í síðasta leik gegn þeim,“ sagði Gylfi þar sem Liverpool skoraði sigurmark í uppbótatíma.

,,Að tapa grannaslag svona, var mjög svekkjandi. Þetta eru leikirnir sem þú ert spenntastur fyrir í upphafi tímabils.“