Mark Clattenburg, fyrrum besti dómari í heimi segir að Mohamed Salah sóknarmaður Liverpool sé að dýfa sér alltof mikið í vítateig andstæðinga sinna.

Salah hefur fengið talsverða gagnrýni síðustu vikur, hann er sakaður um óheiðarleika til að fá vítaspyrnur.

Salah reyndi að fiska vítaspyrnu um helgina þegar hann féll í teignum gegn Crystal Palace. ,,Það var ekki nein snerting þegar Salah féll í viðskiptum sínum við Mamadou Sakho,“ sagði Clattenburg.

,,Það skiptir engu mái þó að hann hafi ekki beðið um vítaspyrnu, hann var að reyna að blekkja Jonathan Moss, dómara leiksins. Hann hefði átt að fá gult spjald.“

,,Salah var einnig sakaður um að láta sig detta gegn Arsenal og Newcastle. Í öllum þessum aðstæðum, þá á hann ekki möguleika á að skora. Hann virðist vilja fá vítaspyrnu.“

Clattenburg segir að Salah gæti verið að þessu til að vinna gullskóinn. ,,Hann er vítaskytta Liverpool, hann veit að hann á góðan möguleika á að skora úr vítaspyrnu. Hann á því meiri möguleika á að vinna gullskóinn.“

Clattenburg segir það ekki erfitt að lesa Salah, látbragð hans sé það sama þegar hann reyni að blekkja dómarann. ,,Ég hef tekið eftir því að þegar Salah lætur sig detta, þá sveiflar hann höndunum upp fyrir hausinn á sér.“

,,Þetta er hlutur sem dómarar horfa í, þegar þeir reyna að meta hvort leikmaður sé að leika. Ef þú ert sparkaður niður þá setur þú hendurnar fyrir þig, til að minnka höggið.“

,,Þangað til að VAr er komið á fullt, þá á leikmaður sem er óheiðarlegur að fara í bann.“