Petr Cech gaf það út á dögunum að hann væri að leggja hanskana á hilluna eftir farsælan feril.

Cech er talinn einn besti markvörður í sögu úrvalsdeildarinnar og þá sérstaklega eftir tíma sinn hjá Chelsea.

Peter Crouch spilaði ófáum sinnum gegn Cech en það tók framherjann heil níu ár að skora gegn honum.

,,Í fyrsta skiptið sem ég spilaði gegn Petr Cech þá leit allt út fyrir að ætla að verða auðvelt. Það var í ágúst 2004 eftir að hann samdi við Chelsea og ég var hjá Southampton,“ sagði Crouch.

,,Við vorum að spila á Stamford Bridge og ég kom inná seint í leiknum. Ég komst framhjá Petr og rúllaði boltanum í netið en línuvörðurinn var búinn að flagga.“

,,Kannski hefði ég átt að taka eftir merkjunum – Það tók mig svo 19 leiki og heil níu ár að skora framhjá honum.“

,,Það eru sum lið þar sem þú veist að þú getur gert vel. Mér leið alltaf vel gegn Arsenal til dæmis en þegar þú mættir Cech þá fórstu ekki brosandi inn í þann leik.“